Wolfgang Amadeus Mozart

Wolfgang Amadeus Mozart  (Salzburgo, 27 de xaneiro de 1756 – Viena, 5 de decembro de 1791), foi un compositor e pianista austriaco, mestre do Clasicismo, considerado como un dos músicos máis influentes e destacados da historia.

Retrato póstumo, obra de Barbara Krafft, 1819.

A obra mozartiana abarca todos os xéneros musicais da súa época e alcanza máis de seiscentas creacións, na súa maioría recoñecidas como obras mestras da música sinfónica, concertante, de cámara, para piano, operística e coral, logrando unha popularidade e difusión universais.

Na súa nenez máis pronta en Salzburgo, Mozart mostrou unha capacidade prodixiosa no dominio de instrumentos de teclado e do violín. Con tan só cinco anos xa compoñía obras musicais e as súas interpretacións eran do aprecio da aristocracia e realeza europea. Ós dezasete anos foi contratado como músico na corte de Salzburgo, pero a súa inquetude levouno a viaxar en busca dunha mellor posición, sempre compoñendo de forma prolífica. Durante a súa visita a Viena en 1781, tras ser despedido do seu posto na corte, decidiu instalarse nesta cidade onde alcanzou a fama que mantivo o resto da súa vida, a pesar de pasar por situacións financieiras difíciles. Nos seus anos finais, compuso moitas das súas sinfonías, concertos e óperas máis coñecidas, así como o seu Réquiem. As circunstancias da súa temprana morte foron obxecto de numerosas especulacións e elevadas á categoría de mito.

Mozart en 1789, por Doris Stock.

En palabras de críticos de música, Mozart sempre aprendía vorazmente de outros músicos e desenvolveu un esplendor e unha madurez de estilo que abarcou desde a luz e a elegancia, á oscuridade e a pasión. A súa influencia en toda a música occidental posterior é profunda; Ludwig van Beethoven escribiu as súas primeiras composicións á sombra de Mozart, de quen Joseph Haydn escribiu que «a posteridade non verá tal talento outra vez en cen anos».